កូរ៉េ៖ ស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ អំពាវនាវដល់ពលករខ្មែរនៅកូរ៉េកុំឲ្យមានការភិតភ័យ និងស្លន់ស្លោតាមការការឃោសនាប្រជាភិថុតិបែបអបិយជំនឿរបស់លោក ខឹម វាសនា ប្រាសចាកពីការពិតនាំគ្នាត្រលប់មកស្រុកខ្មែរវិញខុសច្បាប់ការងារ។
ស្ថានទូតកម្ពុជាបានលើកឡើងថា៖ «ការវិលត្រលប់ទៅកម្ពុជាយ៉ាងប្រញ៉ាប់នេះ ដោយមិនបានទទួលការអនុញ្ញាតពីនិយោជក គឺជាអំពើខុសច្បាប់ ហើយបងប្អូនប្រឈមនឹងការបាត់បង់ការងារនិងផលប្រយោជន៍ កិត្តិយស កេរ្តិ៍ឈ្មោះ និងប៉ះពាល់ដល់ឱកាសការងារសម្រាប់បងប្អូនពលករខ្មែរដទៃទៀតទៅថ្ងៃអនាគត ព្រមទាំងធ្វើឱ្យសង្វាក់ ផលិតកម្មរបស់និយោជកកូរ៉េរងនូវផលប៉ះពាល់ផងដែរ»។
ស្ថានទូតស្នើដល់សាធារណជនពិចារណាឱ្យបានម៉ត់ចត់ ជៀសវាងការជឿទៅលើសំដីបំផុសបំផុលទាំងនោះ ដែលនាំមកនូវការបាត់បង់ផលប្រយោជន៍ផ្ទាល់នាពេលអនាគត។
គួរឲ្យដឹងផងដែរថានៅប៉ុន្មានថ្ងៃនេះលោក ខឹម វាសនា ដែលអំពាវនាវឲ្យអ្នកគាំទ្ររបស់លោកធ្វើដំណើរទៅកាន់ខេត្តសៀមរាបដើម្បីបញ្ជៀសនៅគ្រោះហន្តរាយពិភពលោកដែលនឹងត្រូវជន់លិចលង់។ ការអំពាវនាវនេះបានធ្វើឱ្យអ្នកគាំទ្ររបស់លោកទាំងក្នុងស្រុកនិងក្រៅប្រទេសមួយចំនួនបាននាំគ្នាសម្រុកទៅកាន់ខេត្តសៀមរាបផងដែរ៕